البسكويت الصيامى

المقادير :
2 كوب ونص دقيق .
1 كوب زيت .
3 كوب عصير برتقال .
100 جرام نشادر .
ورقة فانيليا .
1 كوب سكر .
الطريقة :
هتضربى السكر والزيت وعصير البرتقال مع بعض .
هتحطى النشادر مع الدقيق وتخلطيهم .
تعجنى الخليط مع بعض كويس وتبتدى تقطعيه فى صاج مدهونه .
تحطيه فى رف البتوجاز اللى فى النص .
ملحوظه :
البرتقال تعصريه وتصفيه ويفضل البرتقال البلدى بيدى عصير وطعمه احلى .
وبالهنا والشفا يا حلوين .
لو عجبتكم اكتبولى .

الغريبه

المقادير :
2 و نص كوب سمن سايح .
2 ورقة فانيليا .
7 و نص كوب دقيق .
2 كوب سكر ( كل كوب سكر ناقص قيراط ) .
بيضه .
الطريقه :
تربى السمن كويس اوى وتخلطى معاه السكر .
تكسر البيضه وتخطيها وتربيها كويس اوى .
تحطى الفانيليا و بردو تربيها كويس اوى .
تحطى عليهم الدقيق شويه وتضربى وبعد كده تحطى شويه تانى وتضربى كويس اوى .
لما تحسى انك ضربتى الخليط كويس اوى والعجينه بقت طريه ومفيهاش كلاكيع تبتدى التقطيع .
تجيبى صينيه وتدهنيها وتقطعى العجينه وترصى .
حاولى لما تشتغلى متبقىش فاتحه مروحه او لو كنتى فى الشتا حاولى تغطى العجين بفوطه عشان متنشفش .
تدخليها الفرن على الرف الاول على نار هاديه .
ملحوظه :
المقدار ده بيعمل تقريبا فى حدود 50 واحدة غريبه .
ممكن تزينيها باللوز او بالحلوى الفضى المدوره بتبقى عند بتاع الحلويات .
و بالهنا والشفا يا حلوين .
لو عجبتكم اكتبولى .

الكيكه الاسفنجيه

المقادير :
10 بيضات .
10 ملاعق دقيق .
10 ملاعق سكر .
7 ملاعق سمن منها اللى هتدهنى بيها الصينيه .
3 ورقات فانيليا .
ورقة بيكنج باودر .
الطريقه :
هتربى السمنه كويس اوى وتخلطى معاها السكر .
هتربى البيض وتحطى عليه الفانيليا .
بعد كده تحطى البيض على الخليط شويه شويه بس لازم تشيلى الريم .
بعد كده تخلطى معاهم شويه من الدقيق الاول وتحطى البيكنج باودر وبعد كده تحطى الشويه التانيين من الدقيق .
تخلطى الخليط كويس اوى .
تجيبى صينيه وتدهنيها وتحطى فيها الخليط .
تدخليها الفرن فى الرف اللى فى النص .
تراقبيها لحد ماتستوى وحاولى ماتفتحيش عليها الفرن عشان ما تهبطش .
لما تحمر وتحسى انها استوت عشان تتاكدى انها استوت حطى خلة سنان لو طلعت نضيفه مفيش عليها عجين يبقى استوت .
وبالهانا والشفا يا حلوين .
لو عجبتكم اكتبولى .

لقمة القاضى

المقادير :
كوب دقيق .
ذرة ملح .
شوية كركم صغيرين .
ماء ساخن .
قطعه فى حجم عين الجمل خميره بيره .
الطريقه :
تدعكى الخميره و ذرة الملح والكركم والماء مع بعضهم .
تعجنيهم بالدقيق لحد مايكونوا عجينه ماهيه .
لما تظهر فيها الفقاعات تغطيها وتسيبيها تتخمر (يعنى لحد ما تعلى وتملى الطبق او تتضاعف حجمها يعنى ) .
تجيبي حله فيها زيت غزير وتقطعيها حتت على حسب ماتحبى وتقليها .
قدامك حلين يا اما ترشى عليها سكر بودره او تحطيها فى شربات بارد او ماتطلع من الزيت وتطلعيها تصفى .
وبالهنا والشفا يا حلوين .
لو عجبتكم اكتبولى .

بسكويت اللانكشير

المقادير :
نصف كيلو زبده .
ربع كيلو سكر بودره .
75 جرام بياض بيض (تقريبا 3 بيضات) .
ملعقة كورن فلاور .
ملح .
فانيليا .
250 جرام دقيق .
الطريقه :
هتضربى الزبده بالمضرب وتحطى عليها السكر شويه شويه .
تحطى بياض البيض شويه شويه .
تحطى الملح والفانيليا والكورن فلاور و الدقيق وتضربيهم كويس .
تطلع معاكى عجينه ناعمه وحلوه .
تحطي العجينه فى كيس حلوانى وتجيبى صاجه مدهونه .
تقطعى العجينه زى ماانتى عايزه وتحطيه فى الفرن لمدة نصف ساعه .
تخرجي اللانكشير من الفرن وتسيبيه يبرد .
تقدميه فى طبق وممكن تلزقى اتنين فى بعض بالمربى .
وبالهنا والشفا يا حلوين .
لو عجبتكم اكتبولى .

بسكويت النشادر

المقادير :
نصف كوب زبده .
200 جرام سكر بودره .
3 بيضات .
ملعقة فانيليا .
100 جرام لبن .
750 جرام دقيق .
الطريقه :
هتاخدى الزبده و السكر البودره وتضربيهم بالمضرب الكهربائى بالراحه لحد مايدوب السكر وبعد كده تزودى السرعه لغاية مايبقى الخليط متجانس مع بعضه .
تضيفى البيض بيضه بيضه و الفانيليا .
تدوبى النشادر فى اللبن وتضيفيهم على اللى فات .
تضيفى الدقيق شويه شويه .
بعد مايتخلط الخليط وتحسيه ناعم وحلو كده تحطى الخليط فى كيس حلوانى .
تجيبى صينيه وتدهنيها وتشكلى العجين فى الصينيه .
تحطيها فى فرن 180 درجه مئويه لمده 1\3 ساعه .
تطلعيه بعد كده من الفرن وتستنيه لما يبرد وتقدميه .
وبالهنا والشفا يا حلوين .
لو عجبتكم قولولى .