البروفيترول

المقادير :

شوية ماء .

3 ملاعق سكر .

خميره .

6 ملاعق من الزبده على النار .

اقل من كوب دقيق .

3 بيضات .

الطريقه :

فى وعاء على النار تحطى الماء والسكر والخميره والزبده .

تضيفى الدقيق بعد كده وتقلبيه بسرعه .

تشيليه من على النار وتصبيه فى طبق عشان يبرد .

بعد مايبرد شويه تضيفى البيض وتقلبيه كويس لغاية ماتبقى عجينه تقدري تشكليها .

تحطى العجينه فى كيس حلوانى وتجيبى صينيه مدهونه .

تشكلى العجينه على شكل وردات صغيره .

تدخليها الفرن على درجة حراره 400 مئويه .

اوعى تفتحى الفرن عليها لغاية ماتستوى .

بعد ماتستوى تنقليها فى طبق عشان تبرد .

تشقيها بالجنب وتحطى جواها كريم شانتيه او كسترد او ايس كريم .

تحطيها فى كاسات وتحطى عليها شيكولاته سايحه .

وبالهنا والشفا يا حلوين .

لو عجبتكم اكتبولى .

الكيكه الاسفنجيه بالفاكهه

المقادير :
فانيليا .
50 جرام زبده .
175 جرام سكر سنترفيش .
125 جرام دقيق .
2 ملعقه كبيره ماء .
كريز او فراوله .
الطريقه :
تسيحى الزبده مع الماء على النار .
تضربى البيض والسكر لمدة 10 دقايق فى الاول .
بعدين تحطى عليهم الماء والزبده وتضربيهم نصف دقيقه .
وتحطى الفانيليا وتضربى .
بعد كده تحطى الدقيق وتقلبيهم بايدك براحه لغاية مايختلط الخليط كويس .
تجيبى قالب وتدهنيه بالسمن وترشيه بالدقيق .
تحطى الخليط فى القالب وتحطى عليه الكريز او الفراوله .
وبعدين تدخليه الفرن على درجة حراره 190 مئويه .
وتطلعيه من الفرن لمايستوى .
وبالهنا والشفا يا حلوين .
لو عجبتكم اكتبولى .

اللحم البارد

المقادير :
عرق لحمه قطعه واحده .
راسين توم صحيح .
ماء .
ملح .
فلفل .
خل ابيض .
الطريقه :
تجيبى طاسه فيها سمن وتحمرى فيها اللحمه من كل الجوانب وفوق وتحت (يعنى تلسوعيها عشان اللحمه لما تستوى متفقدش المايه اللى فى فتبقى طريه ساعة الاكل ) .
تحطيلها التوم صحيح يتقلب معاها فى السمن لغاية مايتحمر التوم .
تحطى شويه خل قليلين مع اللحمه والتوم لغاية مايتشرب الخل .
تضيفيلها المايه وتتبليها بالملح والفلفل .
بعد كده تزوديلها المايه بالتدريج لغاية ماتستوى اللحمه .
تحطيها فى طبق وتدخليها التلاجه لغاية ماتبرد .
تطلعيها من التلاجه وتقطعيها ترنشات الحجم اللى انتى عايزاه .
تقدميها .
وبالهنا والشفا يا حلوين .
لو عجبتكم اكتبولى .

الفوجرا

المقادير :
لحمه مفرومه حمرا .
3 ملعقة بقسماط كبيره .
ربع كوب لبن .
2 بيضه .
بشر جوزة الطيب .ملح .
فلفل اسود .
الطريقه :
هتجيبى طبق وتعجنى فيه كل المقادير مع بعض .
تجيبى قالب مدهون وتحطى فيه الخليط .
تحطيه فى الفرن لغاية مايتحمر الوش .
تقلبيه فى طبق وتحطيه فى التلاجه .
تقطعيه ترنشات تخينه شويه زى اللحم البارد .
وتقدميه .
وبالهنا والشفا يا حلوين .
لو عجبتكم اكتبولى .

البريوش

المقادير :
كيلو دقيق .
7 بيضات .
400 جرام لبن .
150 جرام سكر .
10 جرام ملح .
300 جرام زبده بدرجة حرارة الغرفه .
خميره .
الطريقه :
نحط الدقيق والبيض بيضه بيضه فى العجان على درجه قليله .
وبعد مانحط بقيه المقادير نرفع السرعه لغاية ماتلاقيها متماسكه .
تخرجيها من العجان وتحطيها فى بوله وتحطيها فى التلاجه لمدة نصف ساعه .
لازم تحطى على حافة الطبق بلاستيك ولو مش عندك ممكن تحطى الطبق فى كيس بلاستيك عشان ميعملش وش ناشف للعجينه .
تجيبى صينيه وتدهنيها .
تقطعى العجينه الى كور وتحطيها فى الصينيه .
تدهنى الوش بصفار بيض عشان تطلع وشها احمر وحلو .
تسيبيها تتخمر وتعلى شويه .
تحطيها بعد كده فى فرن 180 درجه لمدة نصف ساعه .
ملحوظه :
ممكن تتقطع لاشكال كتير مش شرط كور (اللى انتى عايزاه اعمليه ) .
لو حبيتى تعملى ضفيره مثلا حطى نقطه زيت على الطربيزه وافرديها عشان متلزقش منك .
وبالهنا والشفا يا حلوين .
لو عجبتكم اكتبولى .

البتى فور

المقادير :
2 كوب دقيق .
1 كوب سمن جامد .
نصف كوب سكر .
2 بيضه مع نزع شويه بياض منها .
فانيليا .
ربع ملعقة بيكنج بودر .
الطريقه :
ندعك السمن وبعدين نحط عليه السكر لغاية مايكون الخليط زى القشده .
نضيف الفانيليا والبيض ونضربهم مع بعض .
نضيف الدقيق مع البيكنج بودر بالتدريج مع التقليب لغايه مايكون عندنا عجينه ناعمه وتسيبيها فى الطبق .
تجيبى صاج وتدهنيه وتشكلى العجينه وترصيها .
تتخبز فى فرن متوسط الحراره فى الرف الاوسط عشان ميتحرقش منغير مايستوى .
تستنى عليه فى الفرن لحد ما يحمر الوش بتاعه وبعد كده تطلعيه من الفرن .
وبالهنا والشفا ياحلوين .
لو عجبتكم اكتبولى .

كيكة الزبادى

المقادير :
كوب زبادى .
كوب سكر .
معقة سمن .
4 بيضات ( مش بلدى عشان البلدى اصغر فى الحجم ) .
2 كوب دقيق .
باكو بيكنج باودر .
الطريقه :
هتربى الزبادى والسكر وملعقة السمن مع بعض بالمضرب .
هتسيبيه ساعه .
هترضبى البيض الاول .
بعد كده هتجيبى باكو البيكنج باودر على الكوبايتين دقيق و البيض والفانيليا وتضربيهم مع بعض .
هتجيبى صينيه ( انا بعملها مقاس 28 ) وتدهنيها بالسمن وتصبى فيها الخليط .
هتدخليها فى فرن متوسط الحراره .
لتحضير الشربات :
كوب ونص سكر.
2 كوب ماء .
لمونه .
تحطى كله على بعضه وتسيبيه على النار وتقلبيهم  بس متخليهوش يعقد كتير .
تسيبى الشربات يبرد عشان لو اتحط على الكيكه وهو سخن هتعجن .
بعد ماتخرجى الكيكه من الفرن تقطعيها وهى سخنه وتسقيها بالشربات .
ممكن ترشى على الوش جوز هند مبشور بيبقى حلو اوى .
ماحوظه :
مقادير الشربات اللى فوق دى للناس اللى مش بتحب الشربات المسكر جامد او الناس اللى عندها سكر , انما لو عايزاها مسكره يبقى تخلى الماء قد السكر .
وبالهنا والشفا يا حلوين .
لو عجبتكم اكتبولى .

السمان المحشى

المقادير :
4 سمان 
100 جرام زبده
3 بصل مبشور 
300 جرام مشروم 
بشر جوزه الطيب 
2 ملعقه عصير لمون 
2 ملعقه بشر لمون 
2 ملعقه ريحان 
نصف كوب كريمه 
زعتر 
2 ملعقه بقسماط 
ملح 
توابل 
طريقه الخلطه :
نحط البصل المبشور مع الزبده لحد ما يلين البصل بدون ان يتم حرق البصل ونضيف المشروم والملح والفلفل .
نسيب الخيط يبرد .
نضيف للخليط بعد مايبرد بشر جوزة الطيب واللمون المبشور وعصير اللمون والبقسماط  والزعتر والريحان والكريمه .
نحشى السمان من تحت عادى ومن فوق ناحية الحوصله وبعد كده نربط الرقبه بخيط ونقفلها زى الحمام بالظبط ونتاكد ان رابطين الخيط كويس لان الحشو ده مش بينفش زى الرز .
هنحط كل واحده سمان فى ورق الومونيوم .
هنحط بعد كده السمان فى حله فيها ماء مبهر (بهارات - جزر - كرفس - ورق لاورى ) .
هنسلق السمان وبعد كده نطلعه من الفويل .
عشان يدينا لون تحمير حلو ندهن السمان بالزيت ويدخل تحت الشوايه لحد ما ياخد اللون الدهبى الجميل .
وبالهنا والشفا .
لو عجبنكم يا حلوين اكتبولى .

خلطة الفراخ المشوى

الفرخه بتاخد تقريبا 3\4 ساعه عل النار .
تجهز فى اليوم السابق .
المقادير :
نصف ملعقة ملح 
ربع ملعقة فلفل 
ملعقتين زعتر 
نحشى الفرخه من الداخل :
خل عنب  - عصير لمون - ملعقتين ملح صغيرين - ملعقتين زعتر صغيرين - نصف ملعقه فلفل اسود صغيره .
نضع الفرخه فى التتبيله ونسيبها فى التلاجه من بليل لغاية تانى يوم عشان تتشرب .
تشوى الفرخه الكامله فى شوايه فرن البوتجاز .
عند الشوى ندهن الفرخه اثناء الشوى بفرشاه من التتبيله عشان تكون ليها قشره طريه ولونها احمر ذهبى ويبقى اللون متوزع على كل الفرخه .
يقدم معاها رز ابيض بدون شعريه او طحينه او الاتنين .
وبالهنا والشفا .
لو عجبتكم يا حلوين قولولى .

عجينة الشو

المقادير :

1. 140 جرام دقيق .
2. 100 جرام زبده .
3. 250 مللى ماء .
4. 2 بيضه عادى (مش بيض بلدى لانه بيفرق فى الحجم ) .

الطريقه :
نحط الزبده والماء ونصف ملعقه صغيره ملح على النار .
بعد الغليان نحط الدقيق ويقلب بسرعه لغاية ماتنشف العجينه .
بعد كده نحط العجينه فى طبق ونضيف عليها البيض بيضه بيضه ونقلبه كويس اوى .
نحط العجينه بعد كده فى كيس حوانى ( وده هنلاقه عند اى حد بتاع تورت وجاتوه ) .
فى صينيه مدهونه نشكل العجينه على شكل صوابع او دواير .
نحطها فى فرن ساخن ( اوعى تفتحى الفرن عشان العجينه متهبطش ) لحد ما تستوى .
الحشو ممكن يكون كريم شانتيه او كاسترد .
الكرم شانتيه بنجيبه بودره من الحلوانى وبيتعمل بالطريقه المعروفه بالمضرب الكهربائى .
الكسترد بيتجاب من اى بقال وبتعمليه زى مامكتوب على العلبه بالظبط .لكن لو عايزه تعملى الكسترد فى البيت اكيد هيبقى احلى من بتاع بره ودى طريقته :
2 بيضه - 2 ملعقه دقيق - 100 جرام سكر - نصف كيلو لبن - فانيليا .
اللبن بيكون سخن .
نحط السكر والبيض والفانيليا فى طبق ويضرب بالمضرب ويضاف عليه الدقيق .
يضاف على اللبن بعد غليانه مع التقليب المستمر ونستنى لغايه ماتعمل فقاقيع على النار وتبقى قوامعا تخين شويه .
نشيلها من على النار ونصبها فى صينيه حتى تبرد ونحط عليها شويه زبده سايحه من فوق حالا عشان متعملش قشره لغاية مانستخدمها .
نحشى بيها الاكلير .
( فى الحاله دى لو هتحشى الاكلير بالكسترد يبقى لازم متقعدش فى التلاجه كتير لان الكسترد فيه بيض فلو قعد كتير هيبوظ واعتقد ان صلاحيته بتبقى مش اكتر من يومين ) .
للتزيين :
هنسيح شيكولاته ونغمس فيها الاكلير ونسيبها تنشف .
وبالهنا والشفا .
لو عجبتكم اكتبولى .

سالمون طازج

1. 5 فصوص ثوم .
2. فلفل اسود مجروش .
3. ملعقة مسترده بودره (ودى هتلاقيها عند العطار عادى جدا ) .
4. ملعقة بقدونس .
5. 3 وحدات كراث .
6. 2 فلفله احمر .
7. بصل حلقات .
8. روزمارى .
9. 2 جزره مقطعه .

الطريقه :
هنتبل السمك بالملح والفلفل الاسود .
هندق الثوم والروزمارى ويقطع الفلفل الاحمر .
هنحمر البصل فى الزيت لغاية مايدبل ونحط عليه الملح ونطفى النار ونحط عليه شويه مايه عشان يبقى زى صوص قليل فيه ونغطيه .
هنحمر السمك فى الزيت ويوضع فى طبق ويوضع معه البصل المحمر .
هنحمر الثوم وبودرة المسترده والجزر بعد مايتقطع والفلفل الاحمر بعد مايتقطع بردو والكرات كمان متقطع وشويه ملح وفلفل اسود ونحط عليهم شويه مايه عشان يستوى فيهم .
بعد مايستوى الخليط السابق هنحطه على السمك فى طبق التقديم .
وبالهنا والشفا يا حلوين .
لو عجبتكم ابقوا اكتبولى .

البسبوسه

1. 3 كوب دقيق سميط .
2. 3 كوب سكر .
3. كوب ماء الا قيراط .
4. 2 ملعقة سمن .
5. ملعقه صغيره بيكنج باودر .

الطريقه :
نحط البكنج باودر على السميط ونقلبهم مع بعضهم .
ثم نضع كوب السكر وبعد كده السمن ونعجنهم مع بعض ونعجنهم بالماء .
ندهن الصينيه بالسمن ونبططها فى الصينيه ونقطعها وتترك فى الخارج مده لا تقل عن نص ساعه .
لعمل الشربات :
نجيب 2 كوب سكر وعليهم كوب ماء ونحط عليها نقطتين لمون ويترك يغلى مع مراعاة الا يغلظ القوام ويترك ليبرد بعد خروج البسبوسه من الفرن ونحط عليها الشربات وتقطع البسبوسه .
وبالهنا والشفا .
لو عجبتكم يا حلوين اكتبولى .

لمرضى السن الكبير

علشان نفسيه المرضى اللى بيبقى سنهم كبير لازم ياكلوا فاكهه .
وعشان نفسهم تتفتح حاولوا تخلوا شكله حلو.
يعنى مثلا :
فى طبق ابشروا نص تفاحه 
وعيها كام فراولايه متقطعه ارباع 
وكمان موزايه ترنشات رفيعه
وبالهنا والشفا .
ربنا يشفى كل مريض .

فراخ دايت

1. كوب زبادى .
2. ملعقتين كمون صغيرين .
3. ملعقه كبيره لمون .
4. فصين توم مهروسين .
5. ملعقه كبيره كزبره .
6. 4 صدور فراخ مخليين ومنزوعين الجلد .

نخلط الزبادى والبهارات فى طبق .
نحط صدور الفراخ فى التتبيله لغايه ما تتشرب لمدة 4 ساعات فى التلاجه .
نحط الفراخ فى صينيه مدهونه قليلا ونحط عليها شويه من التتبيله .
ندخله الفرن فى درجه حراره 200 لحد مايحمر .
و بالهنا والشفا عليكم يا حلوين .
لو جربتوها وعجبتكم ابقوا اكتبولى .

مربعات الجلاش بالفراخ ( اختراعى )

الاكله دى يا حلوين للناس اللى حابه تعمل دايت .
هتجيبى صدور الفراخ وتقطعيها مكعبات و تضيفى عليها بصل مفروم وملح وفلفل اسود وكارى ومسطرده وخل وعلبة زبادى وزعتر .
هتحطى الخليط فى التلاجه لمدة نص ساعه .
هتجيبى حله بغطاها وتحطى فيها الخليط وترفعيه على النار بدون نقطه زيت او سمن حتى تستوى وتتشرب من السائل تماما .
تحطى الخلط فى طبق وتضيفى عليه جبنه مودزاريلا او رومى عشان تضيفى عليها طعم حلو وتجهزى الجلاش جنبك وكمان صينيه مدهونه .
تقطعى ورقة الجلاش الى اتنين وتحطى الخلطه فى كل نص ويا اما تلفيها بحيث تبقى مربع ملفوف من كل الجهات او ممكن تلفيها زى لفه السمبوسك تبقى مثلث .
ترصيها فى الصينيه المدهونه زيت او سمن بس يبقى قليل عشان الوصفه دى للدايت .
تدهنى الوش بالبيض عشان تحمر وتدى لون حلو .
تدخليها الفرن لحد ما توصل للون اللى انتى عايزاه ,عشان الفراخ انتى مسوياها اصلا قبل كده .
وبالهنا والشفا يا حلوين .
لو عجبتكم قلولى .

فراخ محمره على طريقتى ومعاها رز ابيض

الفراخ دى سهله اوى وسريعه جدا وكمان طعمها حلوه اوى .

1. صدور فراخ نفس شرايح البانيه .
2. زعتر - ملح - فلفل اسود - خل ابيض - شطه (حسب الرغبه) .
3. يقدم مع ارز ابيض (منغير شعريه هيبقى احلى ) .

هتحطى شرايح الفراخ فى طبق وتحطى عليها التوابل والخل وتستنى حوالى نص ساعه .

تشوحى الفراخ فى حتة سمنه وتعملى الرز الابيض وبعد ماتحطى المايه للرز تستنى لما يتشرب الرز المايه شويه تحطى شرايح الفراخ على الرز من فوق ( كده الرز هياخد من طعم الفراخ ) وتغطى الحله عشان الرز يستوى .

وبالهنا والشفا يا حلوين .

لو عجبتكم اكتبولى .

بيتزا صيامى

مبدئيا كده يا حلوين انا مش بعرف استعمل غير الخميره العاديه لكن الخميره الجافه دى عمرى ماجربتها .

1. 2 كوب دقيق .
2. تلات ارباع كوب ماء .
3. ربع كوب زيت .
4. ربع ملعقه ملح .
5. خميره بيره فى حجم عين الجمل .

دى مقادير العجينه ,انما لما تيجى تشتغلى هتبتدى بالخليط الاول عشان يتحط على العجينه وهو بارد بدل ما تهبط .

1. بصله مكعبات .
2. طماطم كامله تحطيها فى مايه مغليه لحد ما قشرتها تبتدى تتشقق وبعدين تطلعيها وتقشريها وتقطعيها مكعبات .
3. سكر .
4. كاتشاب .
5. ترنشات فلفل ( حسب الرغبه ) .

هتنزلى البصله فى شويه زيت لحد ما تدبل وتنزلى عليها بالطماطم وتحطى عليها ملعقه سكر صغيره وملعقه كبيره كاتشاب عشان تبقى مسكره وتحطى عليها الفلفل الترنشات لحد ما تبقى نص متسبكه وتحطيها على جنب عشان تبرد .
كده انتهينا من الصلصه , نيجى بقى للعجينه .
تولعى الفرن على العالى عشان يسخن لحد ماتعملى العجينه .
تخلط الملح مع الدقيق , وتدفى المايه وتحطيها فى كوبايه تكونى حاطه فيها الخميره بعد ما تدعكيها فى معلقه السكر لحد ماتلقيها بقت سايله .
تعملى حفره فى الدقيق وتحطى عليها الخميره السايله و تعجنى .
تضيفى ربع كوب الزيت شويه شويه لحد ماتلاقى العجينه بقت ناعمه ومفيهاش كلاكيع.
تطفى الفرن وتحطى العجينه فى طبق وتغطيه كويس وتحطيه فى الفرن لمده نص ساعه تقريبا او لحد ماتلاقى العجينه عليت واتنفخت .
هتجيبى الصينيه وتدهنيها بزيت وتبططى فيها العجينه وتخليها متساويه وترشى على وش العجينه شوية زعتر ( بيديلها نكهه تحفه ) وبعد كده تحطى عليها الخليط اللى كنتى سايباه يبرد .
وعشان دى صيامى ممكن تحطى عليها بطاطس نص محمره وشرايح طماطم على الوش وزتون اسود ترنشات وتحطيها فى فرن حرارته عاليه لحد ماتستوى وتقريبا بتاخد 50 دقيقه .
انما لو عملتيها بالتونه يبقى لازم تجيبى علبة التونه وتصفيها من الزيت تماما وتعصرى عليها نص لمونه عشان ماتبقاش زفره ولو عايزه تحطى شطه ماشى , بس استنى متحطهاش من الاول حطى البيتزا ف الفرن عادى من غير التونه وطلعيها فى اخر 5 دقايق وحطى عليها علبة التونه ودخليها 5 دقايق بس عشان تسخن بس ماتبقاش زفره .
جربوها وادعولى واكتبولى رايكم .

اندومى بالفراخ

امبارح مليقتش اكل على مزاجى اعمله فى البيت وكان عندى كام كيس اندومى من اخر مره طلعت اجيب فيها البقاله , قلت امرى لله ولانى كنت مكسله اطبخ حاجه وكنت بصراحه جعانه لدرجه انى مكنتش قادره استنى اطبخ .

كان عندى كيس اندومى فراخ و شويه بواقى فراخ من لما كنت بخلى صدور الفراخ اليوم اللى قبله ( حتت صغيره نفس حجم شرايح الشاورما ) وقلت بسم الله وقمت عملت الاتى :

1. حطيت حتت الفراخ ف طبق عليهم ملعقه خل كبيره وشويه ملح وشويه فلفل اسود وشويه زعتر ناشف (عشان بحب نكهة الزعتر اوى) وقلبتهم فى بعض وسبتهم يجى عشر دقايق .
2. فى طاسه ( يفضل تيفال عشان الفراخ متلزقش او تتحرق ) شوحت الفراخ فى حتة سمنه صغيره لحد مابقي ليها لون التحمير الحلو بس منغير ما ازود عليها واحرقها .
3. سخنت المياه فى الكاتيل وحطيت كيس الاندومى بعد ماكسرته للحجم اللى بحبه فى طبق ( يفضل بوله مدوره ) وحطيت التوابل والشطه والزيت اللى بيجى معاه .
4. صبيت المياه على الاندومى وقلبت من تحت لفوق علشان الاندومى يطرى .
5. حطيت حتت الفراخ فى الطبق معاهم وقلبت .

وبكده اديت للاندومى طعم احلى شويه وفايده زياده شويه .

ملحوظه :

الطريقه دى احسن شويه من اللى بتبقى مكتوبه على  الكيس لان ساعات مش بتتظبط معايا كويس والاندومى يطرى زياده عن اللزوم .

بالهنا والشفا عليكم وعليا .

لو حد جربها ابقوا اكتبولى رايكم .

رحلتى فى الحب

رحلتى فى حب الاكل بدات مع بداية ادراكى لريحة التوابل المختلفه وازاى ان كل نوع ليه ريحة ونكهه خاصه بيه وكل اكل ليه نوع خاص يمشى معاه ومش اى حاجه تركب على التانيه ,كل ده بيخلق عالم من المتعه ,متعه اللى بيحب الاكل بس هوه اللى يقدر يستمتع بيها .

 يمكن مع الحياه اللى بنعيشها دلوقتى الدنيا بقت سريعه والوقت بيروح ما بين الشغل و المواصلات وهموم الدنيا لدرجة ان الواحد بينسى يستمتع بواحدة من احلى الحاجات فى الدنيا اللى ربنا ادهالنا ( الأكل ).

زى ما الواحد بينسى يستمتع بحاجات كتير تانى ,يستمتع بالطبيعه ,يستمتع بمنظر الخضره اللى زارعها ف بلكونه بيتهم ,يستمتع بقعدته قدام البحر ,يستمتع باللحظه اللى تعدى عليه وهو مبسوط ,يستمتع بأبسط الحاجات اللى ربنا ادهاله ببلاش منغير مايتعب فيها .

المهم, عشان مطولش على اللى هيقرا ,حبوا الحياه واستمتعوا بكل حاجه فيها .

البدايه

لما كنت بفكر اعمل مدونه ,فكرت ممكن اكتب عن ايه ,فكرت كتير ودورت ف مدونات كتير عن ايه ممكن اتكلم عليه (انى اعمل زى الناس يعنى ) عشان اكتب و الناس تقرا اللى بكتبه (و جايز يكون محدش بيقرالى بردو) و لقيت مواضيع كتير اللى بيتكلم ف السياسه و اللى بيتكلم فى الكمبيوتر والسوفت وير والحاجات دى و اللى بيتكلم فى اى حاجه وخلاص.

المهم مطولش عليكم بعد ما دورت وفكرت كتير قلت اكتب عن اكتر حاجه بحبها ف حياتى 

الأكل 

ياسلاااااااااااااااااااااااااام اكتر حاجه بحبها ف حياتى , مع انى من الناس اللى لو, بس كل ده بيروح لما بلاقى نفسى فتحت تلاجه بيتنا واخد منها اللى انا عايزاه وادخل المطبخ بقى و ابدع , اممممم يا سلام ع الريحه ولا الطعم , ومارتحش غير لما الاقى نفسى خلصت الطبق الى ف ايدى كله , مش مهم , المهم انى استمتعت بوجبه حلوه .

ولانى بحب الاكل , ف اكيد مش هاكل اى حاجه وخلاص .

ولانى بحب اطبخ , هكتبلكوا عن الحاجات اللى بحب اطبخها و استمتع و انا باكلها .

هكتب عن كل تجربه بعملها فى المطبخ , بس امانه عليكم لو عجبتكم ابقوا قولولى عشان محسش انى بكتب للهوا .

معلش طولت ,بس اتعودوا على الرغى بتاعى .