بيتزا صيامى

مبدئيا كده يا حلوين انا مش بعرف استعمل غير الخميره العاديه لكن الخميره الجافه دى عمرى ماجربتها .

1. 2 كوب دقيق .
2. تلات ارباع كوب ماء .
3. ربع كوب زيت .
4. ربع ملعقه ملح .
5. خميره بيره فى حجم عين الجمل .

دى مقادير العجينه ,انما لما تيجى تشتغلى هتبتدى بالخليط الاول عشان يتحط على العجينه وهو بارد بدل ما تهبط .

1. بصله مكعبات .
2. طماطم كامله تحطيها فى مايه مغليه لحد ما قشرتها تبتدى تتشقق وبعدين تطلعيها وتقشريها وتقطعيها مكعبات .
3. سكر .
4. كاتشاب .
5. ترنشات فلفل ( حسب الرغبه ) .

هتنزلى البصله فى شويه زيت لحد ما تدبل وتنزلى عليها بالطماطم وتحطى عليها ملعقه سكر صغيره وملعقه كبيره كاتشاب عشان تبقى مسكره وتحطى عليها الفلفل الترنشات لحد ما تبقى نص متسبكه وتحطيها على جنب عشان تبرد .
كده انتهينا من الصلصه , نيجى بقى للعجينه .
تولعى الفرن على العالى عشان يسخن لحد ماتعملى العجينه .
تخلط الملح مع الدقيق , وتدفى المايه وتحطيها فى كوبايه تكونى حاطه فيها الخميره بعد ما تدعكيها فى معلقه السكر لحد ماتلقيها بقت سايله .
تعملى حفره فى الدقيق وتحطى عليها الخميره السايله و تعجنى .
تضيفى ربع كوب الزيت شويه شويه لحد ماتلاقى العجينه بقت ناعمه ومفيهاش كلاكيع.
تطفى الفرن وتحطى العجينه فى طبق وتغطيه كويس وتحطيه فى الفرن لمده نص ساعه تقريبا او لحد ماتلاقى العجينه عليت واتنفخت .
هتجيبى الصينيه وتدهنيها بزيت وتبططى فيها العجينه وتخليها متساويه وترشى على وش العجينه شوية زعتر ( بيديلها نكهه تحفه ) وبعد كده تحطى عليها الخليط اللى كنتى سايباه يبرد .
وعشان دى صيامى ممكن تحطى عليها بطاطس نص محمره وشرايح طماطم على الوش وزتون اسود ترنشات وتحطيها فى فرن حرارته عاليه لحد ماتستوى وتقريبا بتاخد 50 دقيقه .
انما لو عملتيها بالتونه يبقى لازم تجيبى علبة التونه وتصفيها من الزيت تماما وتعصرى عليها نص لمونه عشان ماتبقاش زفره ولو عايزه تحطى شطه ماشى , بس استنى متحطهاش من الاول حطى البيتزا ف الفرن عادى من غير التونه وطلعيها فى اخر 5 دقايق وحطى عليها علبة التونه ودخليها 5 دقايق بس عشان تسخن بس ماتبقاش زفره .
جربوها وادعولى واكتبولى رايكم .